आखो घर-संसार
म्हैं बारियां खोल
दी
खोल दिया झरोखां रा
पाट
सगळो घर रोसणी सूं
भरीजग्यो
महकण लाग्यो थारी खसबू
सूं
दरवाजा ई खोल देवूं
बारियां सूं जिको
दीसै-
रिंधरोही, डूंगर,
नदियां रो दीठाव
सायत आय जावै घर
मांय
सजावणो चावूं-
म्हारो आखो घर-संसार
म्हैं दरवाजां अर
बारियां माथै
कदैई पड़दा कोनी
लटकावूं।
००००
सगळो
बियां रो बियां
म्हारै
घर में स्सौ कीं
अजेस
अंवेर’र राख्यो है
बारियां
में थारो उणियारो
दरवाजां
माथै पगलिया
आंगणै
में हड़हड़ हंसी
कमरां
में थारी खसबू
बिछाणां
माथै थारो परस
अबार
तांई चिप्योड़ी है-
भींतां
माथै थारी मुळक
स्सौ
कीं है बियां रो बियां
आळै
में भेळावणां
अलमारियां
में ढिगलो-ढिगलो ओळूं
सावचेती
सूं सजा’र राख्योड़ी है,
कलेंडर
माथै गयै दिनां रो हिसाब
सगळो
है बियां रो बियां
पण
हां कठैई फोटू कोनी थारी।
००००
ओळू-1
ओळू
आवै-
जद-जद
बैठां
कीं
सावळ करण नै
कीं
नवो रचण नै।
ओळू
आवै-
गळियारां
री, दरवाजां री
जातरावां
री...
क्यूं
आवै ओळू
चंचेड़
नै का फेर
देवण
नै पछतावो
बुरी
ओळू कोनी आवै
हां .... बुरी ओळू कोनी आवै
हां .... बुरी ओळू कोनी आवै
बुरी
ओळू जद कदैई आवै
म्हैं
मुळकण लागूं।
००००
ओळू-2
पूरी
रात जागतो रैयो
सुपनां
सजावतो,
थूं
आवै ही, जावै ही
भळै
आवती, भळै जावती,
पण
ओळू पसवाड़ो फोरियां सूती रैयी।
दिनूगै
ओळू ही
जिकी
म्हनैं चंचेड़ियो अर जागायो
जद
म्हैं जागग्यो
ओळू
अळघी ऊभी होय’र
घूर-घूर’र
म्हनै देखै ही
अर
मुळकै ही,
म्हैं
कैयो-
चालो
मारग लेवो,
अबै
आज नवै दिन
म्हैं
नवी ओळू भेळै रैसूं
ओळू
नैड़ी आयी
अर
हंसण लागी जोर-जोर सूं
लाख
करियां जतन
ओळू
कोनी खिसकी
ओळू जावै कोनी
ओळू जावै कोनी
पूरै
घर माथै कब्जो कर’र
बस
जावै सदा खातर
ओळू जिकी एक’र जुड़ जावै
बा
जावै कोनी
फगत
पसवाड़ो लेय’र
सूय
जावै।
००००
००००
जमीन
शहर है कै पसरियां जावै
आपां री आंख्यां में
आपां रै सुपनां में
अणजाण हुवता जावै-
जाणीकार चैरा
सांसां पड़ण लगागी है कमती
दसवै मालै री ऊंची बारी सूं
लोगां नै कोनी सूझै-
जमी माथै ऊभा आपां
शहर है कै परसतो जा रैयो है
थूं कैवै-
छोड़णी कोनी आपाणी जमीन !
उणियारो
म्हारै उणियारै रो
कोई डील कोनी
ना हाथ, ना पग
ना ही कोई पेट
फगत खाली उणियारो है।
हां मांय सूं साव खाली
पूरी तरै सूं थोथो
संवेदनावां सूं, सोच-विचार सूं,
साव थोथो।
पण म्हारो उणियारो सावचेत है
बां संवेदनावां सारू
जिकी उण सूं जुड़ियोड़ी है
उण सोच-विचारां सूं
जिका में फगत मतलब हुवै निजू
बां चिंतावां खातर
जिण सूं उणरो निजू सरोकार हो।
उण नै जरूरत ई कोनी पड़ै
हाथां री, पगां री,
अर ना ई कदैई पेट री
उण नै जरूरत है- फगत उणियारां री
उणियारै नै उणियारो बणावण खातर।
इणी खातर
बो फगत एक उणियारो है
उण रो कोई डील कोनी।
००००
अनुवाद- नीरज दइया
====================
परिचै : कुँअर रवीन्द्र आखै
देस-विदेस कला-जगत रो जाणीजतो चावो-ठावो नांव है। रंग, रेखावां अर सबदां रै कलाकार-कवि
के. रवीन्द्र रो जलम 15 जून, 1959 नै मध्यप्रदेश रै रीवा में हुयो।
आप पत्र-पत्रिकावां, पोथ्यां रै आवरण अर ब्लॉग-जगत में घणा सक्रिय-सैयोगी दीसै।
केई मान-सम्मान सूं आदरीज्या अर एकल प्रदर्शिनियां सूं चरचा में रैया। आप मूल में
भोपाल वासी पण अबार रायपुर बिराजै, राजकाज रै सीगै छत्तीसगढ़ विधानसभा सचिवालय में
कारज। ई-मेल : k.arvindrasingh@yahoo.com
====================
कोई टिप्पणी नहीं:
एक टिप्पणी भेजें