16 दिसंबर, 2010

सुरजीत पातर

सबद
सबद मुगत ई कोनी करै
बखड़ी में ई लेवै…

म्हारै असवाड़ै-पसवाड़ै बै कदैई-कदैई
इण ढाळै री ओळियां जरू करै
कै म्हारो जी मुसीजण लागै

म्हनै इण ओळियां सूं
उबरण खातर
चाइजै एक ओळी

उण ओळी रै बिना
मुसीजै म्हारो जी …
***

म्हैं कविता जोया करूं
म्हैं कविता जोया करूं
कदैई हथियार दांई
कदैई पाणी रै ठंडै प्यालै दांई
कदैई मलम दांई
कदैई अंधारै घर मांय
मैणबत्ती दांई
कदैई कोई जोया करै जियां सायरो

म्हैं कविता जोया करूं
कठै सूं ई मिलो
किणी सूं ई मिलो
किणी पोथी सूं
किणी पत्रिका सूं
म्हारी बोली सूं
का म्हारै मन सूं…
***

आज म्हैं जठै ऊभो हूं
आज म्हैं जठै ऊभो हूं
हो सकै काल बठै ना ऊभूं

पण जठै-कठै ई ऊभूंला
आ राखूंला चेतै
कै म्हारै पगां सूं कोई नीं किचरीजै

आज म्हैं जठै ऊभो हूं
हो सकै काल बठै ना ऊभूं
पण जठै-कठै ई ऊभूं
आ सावचेती जरूर राखजो
कै बठै सूं म्हनै दीखती रैवै
आंख्यां मांय आंसु भर
बेटै नै पेट खातर
परदेस भेजती मा…
***

म्हारी साख
कदैई म्हैं धूड़ दांई
बां रै पगां हेठै किचरीज्यो हो
कदैई बै खुद री निजरा ऊंची कर
म्हनै गगन रै तारां दांई निरखता रैया
इण खातर म्हैं खुद रो खरोखर नांव
कदैई कोनी काढ सक्यो
अर खुद री साख बोलतां
ताळवै चिपती रैयी म्हारी जबाब …
***

हादसो
इण घर मांय
देख्यो कांई हादसो
कै भींत माथै छटपटा
आंगणै आ पड़ी फोटू …
***


पुळ
म्हैं जिकै लोगां खातर पुळ बणायो
बै जद म्हारै ऊपरिया कर धकै बधै हा
म्हैं सुणियो म्हारै खातर कैवै हा-

बो कठै छूटग्यो घुन्नो आदमी
स्यात पाछो मुड़ग्यो लारै

म्हांनै तो पैलां सूं ई’ज ठाह हो
कै उणां मांय दम कोनी !

दिसावर
म्हैं भरूं दो-तीन डग
कै अबै दिसावर आय ढूकै
म्हारै लगायोड़ा रूंखां री छींयां
किअतरी ओछी है !
***

फरक
जद छोटा हा
एक बाग मांय फूल घणा हा
अर आपां दोवू दोय हा

पण आज जद ऊमर आयगी
बाग एक है
आपां दोय हां ।
***
अनुसिरजण : नीरज दइया

*******************************************************************
पंजाबी कवि : सुरजीत पातर ;  जलम : 1944
काविता पोथ्यां : हवा विच लिखे हरफ, लफ्जा दी दरगाह चर्चित । साहित्य अकादेमी पुरस्कार, पाश पुरस्कार नै सरस्वती सम्मान सूं आदरीज्या थका ।
*******************************************************************

कोई टिप्पणी नहीं:

एक टिप्पणी भेजें