राजी
थूं हुवै राजी
देख ढळतो म्हारो गीरबो
देख म्हनै हरतो
थारै घणी बापरै सोरप
म्हैं होवूं राजी
देख’र थनै राजी
थनै जीतावण रै चाव मांय
म्हैं हर बार हारतो जावूं
***
दुख भरी सिंझ्यां
जित्ती ताळ मीत हा आपां
कित्ती सोरी ही जिंदगाणी
ना थूं लुगाई ही
ना म्हैं आदमी
एक दूजै रो पीड़
बांटण री करता तजबीज.....
चाणचकै
ठाह नीं हुयो कांई हादसो
डील सूं डील परसियो
आपां बणग्या -
आदमी अर लुगाई
प्रीत रै हरख मांय
हेत रै दरद मांय
अबै मिलां
तद बा बात कठै
मनां में चोर बड़ग्यो
मिलां तद हुवा राजी
बिछड़ा तद दुनिया भर री उदासी
आंख्यां मांय भर नै
सड़क्यां-चौराहां सूं भटकता
करां कितरा छळ
पण म्हारी मीत
फेर ई इंयां नीं लागै
कै बिछड़ण री
आ दुख भरी सिंझ्यां
कितरी व्हाली है...
उदासी है
भलाई जानलेवा
पण दुनिया री
सगळी खुसियां माथै है भारी.....
***
मछल्यां
उण री उमर मांय
जद आयो प्यार
तद उमर ही उण रै टाबरां री
कै बै करै प्यार
जद जग्या उण रै नैणां मांय सुपनां
तद पंखेरूवां रै बावड़ण रो बगत हो
उण री उमर में
जद आयो प्यार
तो उण नै
फिश एक्वेरियम मांय
तिरती मछल्यां माथै
घणो आयो तरस
फैंक दियो उणा
एक्वेरियम नै धरती माथै
मछल्यां नै
आजाद करण रै मिस
पण
तड़प तड़प’र
मरगी मछल्यां
धरती माथै
पाणी बिना
नीं जाणै ही
बा बावळी
कै मछल्यां नै
आजाद करण रै चक्कर मांय
उणा मछल्यां माथै
करियो है कितरो जुलम....
***
प्यार
इत्तो है म्हारै मांय प्यार
जित्तो सागर मांय पाणी
आंख्यां मांय जितरा आंसु
जितरी होठां माथै मुळक
इत्तो है प्यार म्हारै मांय
जित्तो माटी मांय अन्न
पाणी मांय जितरो जीवण
हवां मांय जितरो प्राण
आभै मांय पंखेरू जितरा
पंखेरूवां रा पांखियां मांय
उडाण है जितरी
उत्तो है प्यार म्हारै मांय
जितरा कवियां पाखती है सबद
सबदां मांय जितरी आब
टाबरां री आंख्यां मांय जितरी भोळप
पगां मांय जितरी हुवै मुसाफरी
अर आंख्यां मांय हुवै जितरा सुपनां
इत्तो है प्यार म्हारै मांय
जितरी किणी जोगी री बीन मांय
हुया करै हवा
हवा में जितरी हेकड़ी
जितरी लकड़ियां मांय आग
जितरी सूरज मांय गरमी
इतरो है म्हारै मांय प्यार
***
अनुसिरजण : नीरज दइया
पंजाबी कवि : अमरजीत कौंके
काव्य संग्रै : निरवान दी तलास, द्वंद्व कथा,यकीन,सबद रहेंगे कोल, स्मरतिन दी लालटेन पंजाबी में अर तीन हिंदी में "मुट्ठी भर रोसनी", "अंधेरे में आवाज" व "अंतहीन दौड़" चर्चित काव्य पोथ्यां । संपादक- प्रतिमान । ब्लॉग : http://amarjeetkaunke.blogspot.com/
*******************************************************************
कोई टिप्पणी नहीं:
एक टिप्पणी भेजें