02 दिसंबर, 2010

सुमा जोसन

प्रेम कविता
आडै री सेरी रै बिचाळै कर
जिसा देख्या म्हांनै,
रमता
ताळ मांय
अर बारै, कांठै माथै ।

ताळ रै मांय, मतलब मरणो
अर उण रै बारै हो जीवणो ।
थूं कीं कैवतो
अर म्हानै छलांग लगावणी ही,
थारै गीत री
मधरी-मधरी तान रो मतलब होंवतो
म्हानै जीवणो है अजेस कीं दिन भळै ।

तद जद कै थूं बिराजै हो
डाळ माथै एक मून झाल्यां,
अर म्हैं ऊभी ही
जीवण-मरण रै बिचाळै किणी टुकड़ै माथै…
जीसा दीठाव माथै जाणै झपटिया
अर पेड़ रा पानड़ा लेय पड़िया ।

घड़ीक मांय
जिंयां कोई सुपनो दीसै
खुलता नींद अचाणचकै
थूं अलोप हुयग्यो…
पण साथै लेयग्यो
थूं थारो मधरी-मधरी धुक-धुकी वाळो दिल
म्हैं जोयो थनै बरसां रिंधरोही मांय
अर समदरां रै कांठां जायर नै ।
घर बावड़िया एक रात
म्हैं थनै पाय लियो लारली बाखळ मांय
एक पिंजरै मांय जिको म्हैं कदैई लाई ही भांग रोकड़ा
टाबरपणै रै दिनां एक दुकान सूं ।

म्हैं उडीकती रैयी
मा पूरी बतियां कद बंद करै ।
उण घड़ी पछै म्हैं बारै भागी…
अर थनै कर दियो मुगत ।

चांदणी मांय
लोह आळी सळाखां री छिंया रै बिच्चै
थूं बांधी एक अदीठ डोर
म्हारै पौंचै
अर आभै कानी उडग्यो
गांठिया सुळझावण नै ।

कदैई-कदैई म्हैं रोवूं थारै खातर ।
कदैई-कदैई थूं म्हनै तिरण देवै,
घास रै माथै ।
कदैई-कदैई म्हैं बताऊं खुद नै,
कै म्हनै छोड़ देवणो चाइजै स्सौ कीं जमी माथै
अर डोर रै सायरै चढणो चाइजै
थारै तांई पूगण तांई ।

आपां इंयां ईज जीवां…
रितुवां रा टांकड़ा
चिमठी-चिमठी ओळूं सूं मनावतां ।
एक दिन
थूं का म्हैं मर नीं रैवाला
दूजो डोरी रै साथै-साथै जावैला
जठै सगळी दिसावां रुक जावैला ।
अर छेकड़ मौत लेय नै आवैला
उजास री एक जमीं मांय…
उण प्रेम नै जिको आपां मांय एक दूजै सारू हो ।
***

पटाखां रो परब
काल सिंझ्यां म्हैं छोड़ दियो डर नै
रात मांय उतरतै दरवाजै री निसरणी माथै ।
एकाएक आई बिजळी अर लेयगी उण नै
पंखेरू समझती थकी ।
बो आखी रात रुळतो रैयो
कानां मांय सुणीजती रैयी फड़फड़हट ।
पण म्हैं अबै उण नै कीं नीं देय सकूं
फगत इण रै कै जे बो तिर परो आवै पाछो
धरती माथै पूगणियै उण झरणां मांय कर
कै जिण सूं भूल्योड़ी आंटी-टेड़ी नदियां रै पाणी माथै पूगै
अर आय जावै नानकियै री उण दड़ी तांई
जठै कै बो गुड़ी-मुड़ी, सलेटी, सीयां मरतो
लोह री अलमारियां बिचाळै कठैई बैठो हुवै
आंख्यां मींच्या अर कानां अढाळियां-
पटाखां रै परब सूं जगमगावतै घर सूं अलायदो-
तद स्यात बठैई मिल जावै कीं,
बठैई जठै हुई ही इण री सरुआत ।
***

चेरी
अबै म्हैं थांनै सुणा दूं साची-साची कहाणी
फालतू है लेवणा ओळावा-
छोटा-छोटा, नान्हा-नान्हा जिन्न
थांरी मा नै लेयर जावै अर छोड़ियावै
जादू री रिंधरोही मांय
अर खुद लुक जावै कठैई डाळियां मांय ।
एक चिड़कली रै पगां सूं बंध जावै उण री चाल,
उण री उछालां सूं उणी री फड़फड़ाट सूं
अर चॉकलेट रै चमकीलै कागदां जिंयां
रंग-बिरंगी परी कथावां रा
खुल जावै फोटू आंख्यां सामीं ।
माफ कर दिया म्हनै,
म्हैं अठै नीं बणूं थांरी भीड़ू
जिकी बणायर देय देवै थांनै
रेसमी रिबनां सूं तितली रा पंख ।
आ ईज बा लाचारी
जिकी सूं किलीज जावूं म्हैं  
अर उण रो उपजणो नीं जाण सकूं ।
पण मिलै जिको टैम इण बिचाळै
उणी मांय आवूं भागी-भागी
अर भींच लेवूं थनै खुद री छाती मांय ।
इण ढाळै भरियां बाथ
डील मांय उपजै ऊंड़ी एक कसक
जिकी देवै म्हनै एक मरण खुद रै लारै ।
टाबरां, काल रात म्हैं थांरै खातर
मथर राखी ही थोड़ी-सी आइसक्रीम
जद थे घुप्प नींद मांय हुवैला सपनां बिचाळै
तद बा जम जावैला
अर जद थे अळसा-मळसा करता उठाण नै हुवैला तैयार
थांरी उडीक मांय एक निजराणो
क्रीम माथै सज्योड़ी
लाल-लाल चमकीली तीन छोटी चेरियां
ओ ई है जिको रैवैला सदीव साथै
उण रूपाळी ओळूं री एवज मांय
जिकी स्यात कदैई नीं देय सकूं थानै ।
***

अनुसिरजण : नीरज दइया




*******************************************************************
अंगेजी कवयित्री : सुमा जोसन ; जलम : 8 नवम्बर केरल
कविता संग्रै : दो कविता संग्रै एक उपन्यास प्रकासित नै विविध विधावां में ई लेखन अर प्रकासन ।  
********************************************************************


कोई टिप्पणी नहीं:

एक टिप्पणी भेजें